Ulqin 17.1.2010: Me rastin e  lajmit të sotshëm që Mali i Zi dhe Kosova, kanë vendosur  marrëdhëniet diplomatike  me shkëmbimin e letrave të ministrave të punëve të jashtme të Malit të Zi dhe të kosovës, Mehmet Bardhi, kryetar i Lidhjes Demkratike në Mal të Zi, dha këtë  

D e k l a r a t ë 

Lajmi që sot u dha në mjetet e informacionit që Mali i Zi dhe Kosova, kanë vendosur marrëdhëniet diplomatike  me shkëmbimin e letrave të ministrave të punëve të jashtme të Malit të Zi, zotëri Millan Roqen dhe të kosovës, Skënder Hyseni, është lajm i mirë, të cilin akt  e  përshëndesim. Është lajm i mirë sepse ishte edhe akt i pritur. Kishte nevojë edhe kushtet ekzistonin, që këtë ta kryenin edhe më herët, por edhe tash nuk është vonë, sidomos po të kemi parasysh kankulimet politike, klimën politike brenda Malit të Zi, e sidomos  sugjerimet dhe presionin politik nga Serbia, e cila insistonte që Mali i Zi mos të ngutet me vendosjen e marrëdhënieve diplomatike me Kosovën deri sa Gjykaka Ndërkombëtare e Hagës mos të bjerë vendim. 

Them se është mirë, pikë se pari për Malin e Zi e pastaj edhe për Kosovën. Është mirë pasi Mali i Zi e Kosova janë dy shtete fqinje, e me fqiun, dihet se, marrëdhëniet gjithëherë duhet të jenë të mira... Në rastin konkret kemi të bëjmë me dy shtetet më të reja fqinje në Ballkan, prandaj nevoja është edhe më e madhe. Mirë është edhe për tërë regjionin, pasi që këto marrëdhënie i kontribuojnë,jo vetëm marrëdhënieve të mira, por ato janë bazë edhe për stabilitetin. Madje  është mirë edhe për çështjet eventualisht e të hapura e kontestuese që mund të jenë, marrëdhëniet diplomatike janë parakusht që të zgjidhën me bisedime e marrëveshje.       

Globalizimi politik e gjithënjë e më tepër sidomos ai ekonomik, kërkon gjithnjë e më tepër koordinim në mes të shteteve, sidomos atyre fqinje, për të arritur marëveshje e koordinime për një funksionim më të mirë të ekonomisë, e çështjeve të tjera, poashtu edhe kundërvënia dhe lufta kundër kriminalitetit të organizuar në regjion dhe më gjërë etj. etj.  

Pastaj,  është mirë edhe për arsye se në Malin e Zi sot, në trojet e veta stërgjyshore, në kufi me shtetin amë Shqipërinë, nga Rozhaja deri në Ulqin,  jetojnë shqiptarët, ndërsa edhe në Kosovë - një numër qytetarësh  me prejardhje sllave, si serbë, malazezë etj. 

Mendoj  se vendosja e marrëdhënieve diplomatike e shtetit të Malit të Zi me me shtetin e Kosovës është mirë për të gjithë fqinjët, pra edhe për Serbinë, sepse me këtë  Serbisë  i ndihmohet që ajo më lehtë dhe realisht të kuptojë  ngjarjet jo vetëm të të sotmes, por edhe të pranojë realitetin – Kosovën e pavarur dhe të mëvetsishme, ecila, nëse duam të themi të vërtetën, nuk ishte diçka e papritur. 

Prandaj pres që në një kohë sa më të shkurtër Qeveria e Malit të Zi të dërgojë ambasadorin e vet në Prishtinë, të cilit i uroj suksese dhe të gjitha të mirat, si edhe ambasadorit të shtetit të Kosovës në Podgoricë, për të cilin sa  kam informacione, do të jetë kolegu im nga ditët e nxehta politike studentore të viteve 1968-1972, zotëri Azem Vllasi, të cilit poashtu i uroj mirëseardhje dhe vazhdimësi të sukseseve të Kosovës në politikën gjithëshqiptare, regjionale e ndërkombëtare. 

Në fund , sinqerisht shpresoj që kësaj radhe  nuk do të ketë taktizime e kalkulime nga a na e Malit të Zi për shkëmbimin e ambasadorëve, ashtu siç patën në periudhën e kaluar, që nga vendimi i Podgoricës që zyrtarisht pranoi shtetin e pavarur të Kosovës (më 09 tetor 2008)  e deri sot.

 Mehmet BARDHI

Reagim

KOHËN JAVORE s’guxon askush ta shuajë!

KOHA JAVORE për shqiptarët është shumë më tepër se POBJEDA për malazezët!

Kur këto ditë, pikërisht më 4 prill 2009,  e gjithë bota shqiptare  po feston anëtarësimin e Shqipërisë në Aleancën e Veri-Atlantikut, nga redaksia e të vetmës gazetë në gjuhën shqipe në MZ, KOHA JAVORE, nga redaktori i saj përgjegjës z. Ali Salaj, morëm lajmin se qeverisja malazeze (për të satën herë me radhë në kësi rastesh) po na përgatitë përsëri një befasi  “të këndshme”, shuarjen e të vetmës gazetë në gjuhën shqipe  KOHËS JAVORE!?

“Si  pasojë e dështimit të tenderit për privatizim të SHAGBG “Pobjeda” dhe për shkak të krizës financiare me të cilën po ballafaqohet kjo kompani, në bazë të propozimeve të dala nga Qeveria e Malit të Zi (Ministria për Financa)  mbi masat e kursimit dhe racionalizimit,  ndërpriten ose reduktohen botimet suplemente  (disa shtojca  dhe revista “Porodicni magazin”). Ky reduktim e përfshiu edhe gazetën e vetme në gjuhën shqipe “Koha javore”, e cila në të ardhmën do të botohen një herë në javë në formë shtojce prej 4 faqesh në të përditshmën “Pobjeda”...”, thuhet në shkresë.

Lajmi është i qartë Qeveria – Ministria e Finansave  “kursimin e racionalizimin” në këtë krizë finasiare (vallë a vetëm finasiare!?) planifikon ta fillojë e ta bëjë me shqiptarët, me të vetmën javore në gjuhën shqipe!? Ky është vendimi i  atyre që sa herë që e do puna për interesa e poena politikë, para faktorit ndërkombëtar përsërisin përmendësh “ se Mali i Zi është shembull i harmonisë multietnike...”. Vallë kështu na qenka “harmonia multietnike...” duke planifikuar reduktimin e privimin e të drejtës themelore - të drejtën e informimit në gjuhën amtare shqipe, po çka që ky veprim do të jetë në kundërshtim edhe me dispozitat e Ligjin për të Drejtat dhe Liritë e Pakicave po edhe me Kushtetutën e Malit të Zi, madje ashtu të cunguara e diskriminuese, kur është fjala të te drejtat e pakicave!?

Lidhja Demokratike dhe unë si kryetar e deputet i saj dhe deputet i ardhshëm i LISTËS SHQIPTARE, kundërshtojmë me forcë këtë planifikim ugurzi të mbylljes së gojës së të vetmës gazetë në gjuhën shqipe.

Vallë, athua gjithmonë ne shqiptarët duhet të jemi fajtorë e humbësit kujdestarë kur është fjala ”për të mirën e përgjithshme të Malit të Zi!?”

Jo zonja e zotërinj pushtetarë. Kjo kësaj radhe nuk guxon të ndodhë. KOHA JAVORE nuk guxon të shuhet as të reduktohet e të bëhet nënfletë e POBJEDËS.  Dalja e saj në dritë me vendim të Kuvendit të MZ, me pjesëmarrje e me një pajtim të plotë të pozitës dhe opozitës parlamentare, pas kërkesës këmbëngulëse të LD-së e timin si deputet, ndihmësekretarit për informata të MZ-së, z. Nikollë Camaj, e pëlqimit, pjesëmarrjes dhe përkrahjes së plotë të sekretarit D. Jarediq e kryetarit të parlamentit S. Maroviq, më 20 qershor 1999, është një e drejtë e arritur, që pushteti në emër të asnjë shkaku as arsyeje  nuk mund ta vëjë në pikëpyetje jetën e saj.

Prandaj Lidhja Demokratike në Mal të Zi  dhe unë si deputet do të vemë në dispozicion gjithë qenjën e dijen tonë, ashtu siç e vumë për ta formuar, tash  mos ta lejojmë që ta shuajnë.

Ftoj opinionin demokratik e përparimtar, subjektet politike e të tjerë organizma që kultivojnë demokracinë që ta ngrisin zërin kundër këtij plani asimilues.                                                                                                  

SHQIPTARËT NË MAL TË ZI - POPULL AUTOKTON
LIDHJA DEMOKRATIKE - PËRFAQËSUESE AUTENTIKE E TYRE

LIDHJA DEMOKRATIKE NË MAL TË ZI është parti politike e qytetarëve të lirë, të organizuar vullnetarisht me qëllim të pjesëmarrjes aktive në jetën politike, shoqëroro-ekonomike dhe kulturore, duke shprehur dhe avancuar specifikat nacionale të popullit shqiptar në trojet e veta shekullore, sot në Malin e Zi, me qëllim të përfaqësimit politik ...dhe mbrojtjes së të drejtave e interesave të tyre.
Përfaqësuesit e shqiptarëve, nga vatrat e tyre shekullore sot në Mal të Zi: nga Rozhaja, Plava dhe Gucia, Malësia – Tuzi, Kraja – komuna e Tivarit, nga Ana e Malit e Ulqini, u mblodhën më 9 shtator 1990 në Tuz, në Kuvendin themelues dhe formuan partinë e parë politike të shqiptarëve në Malin e Zi. Kryetari i Kuvendit themelues ishte aktivisti i njohur dhe atdhetari zotëri Lekë Lulgjuraj. Partia është organizuar sipas principit territorial e demokratik. Parimet themelore që përmbajnë dokumentet programore të partisë pasqyrojnë interesat politike, ekonomike e nacionale të qytetarëve, të cilët LD në MZ i përfaqëson në mënyrë legjitime –  të shqiptarëve.
Si Parti e qendrës së djathtë, LD në MZ synon të zhvillojë dhe të mbrojë interesat nacionale të shqiptarëve, demokracinë, të drejtat individuale dhe kolektive, liritë e njeriut dhe prosperitetin ekonomik, si dhe të mbrojë rregullin dhe shtetin juridik e demokratik, të bazuar në ekonominë e tregut dhe respektimin e pronës.
LD në MZ angazhohet: të mbrojë interesat nacionale me anë të përfaqësimit autentik, të drejtat dhe liritë e njeriut, si dhe të drejtat nacionale kolektive të shqiptarëve në Malin e Zi dhe të qytetarëve të tjerë, të bazuara në orientimet programore të LD në MZ-së, duke respektuar dokumentet dhe marrëveshjet ndërkombëtare; të ndërtojë demokracinë, duke respektuar të drejtat e njeriut të mbrojtura me standarde ndërkombëtare, të bazuara në bashkësinë e njerëzve të lirë dhe të ndërgjegjshëm, të cilët bashkëpunojnë, respektojnë njëri-tjetrin dhe marrin përgjegjësi të përbashkëta të ndërtojë shtetin juridik me raporte të balansuara dhe pushtete të ndara qartë, si garant për jetën, lirinë dhe të drejtat e qytetarëve, të garantuara me kushtetutë dhe ligje demokratike; të garantojë të drejtat e pronës private, paprekshmërinë e saj dhe të drejtën e pronarit që ta administrojë, trashëgojë dhe kompenzimin e saj me vlerë të plotë të tregut.
Veprimtaria polike e LD-së, në të gjithë rrafshin politik të Malit të Zi, ku gjendet tash gati dy dekada, në kushte të pushtetit krejtësisht të centralizuar, ka qenë e kufizuar, çka bukur shumë e ka zvogëluar mundësinë e realizimit të synimeve programore të Partisë. Gjatë tërë kësaj kohe, raporti i pushtetit aktual ndaj shqiptarëve dhe të drejtave të tyre e territoreve ku ata jetojnë, ka qenë herë i hapur, herë i mbuluar, herë i ashpër e i fuqishëm e herë i butë, por injorues, madje edhe diskriminues, në kundërshtim me parimet demokratike dhe parimet e gatitshmërisë për vendosjen e besimit reciprok të vërtetë e të drejtë ndërnacional, si kusht dhe garant për ndërtimin e shoqërisë përparimtare dhe stabile, të drejtave dhe shanseve vërtetë të barabarta.
Si dëshmi për tërë këto i sjellim disa shembuj: Centralizimi i pushtetit, i cili ka filluar në vitin 1992 e po vazhdon edhe sot, si p.sh. me aprovimin e para pakkohësh ( më 26.03.09) të Ligjit për Pasurinë Shtetërore, ku nga deputetët shqiptar unë isha kundër (paraqita 11 amandamente, por si zakonisht shumica qeveritare DPS-SDP-UDSH, i refuzoi) me të cilin shteti  në mënyrë arbitrare vë të drejtën e pronësisë pothuajse mbi tërë pasurinë e komunave, si p. sh. të ndërtesave të shkollave, madje edhe të ndërtesës së Shkollës Fillore, që pas termetit  të 1979 ishte donacion i Italisë, Shtëpia e Shëndedtit donacion i Rumanisë komunës së Ulqinit, madje e tërë ish pasuria joperspektive e ish ushtrisë etj. etj. ; Politika dhe praksa okupatore e koloniste përmes të ashtuquajturit privatizim duke mos pyetur pushtetin lokal...; Anulimi, dy herë, i Vendimit të KK Ulqinit për Emërtimin e Rrugëve dhe Shesheve nga Gjyqi Kushtetues, vetëm sepse ato ishin në gjuhën shqipe dhe ishin emra nga kultura shqiptare...; Aksioni policor „Fluturimi i shqiponjës“, arrestimi dhe tortura ndaj qytetarëve të pafajshëm shqiptarë të Malësisë; Mosrealizimi i të drejtës për vetëqeverisje lokale në territorin e Malësisë; Pastaj rasti i Valdanosit, mënyra e administrimit të të mirave detare, shfrytëzimi i „Plantazhave“, projekti i Parkut Nacional „Prokletije“ në komunën e Plavës, me të cilin po tentohet që edhe në të ardhmen të mbahet tampon zona në mes shqiptarëve në trojet e veta, sot në Malin e Zi dhe shtetit amë Shqipërisë, dikur me ushtarë të armatosur, tash me polici, e nesër me renxherë të armatosur, moslejimin e regjistrimit të partive politike shqiptare në gjuhën shqipe, mos lejimin e përdorimit të flamurit kombëtarë në institucionet shtetërore e komunale me rastin e festave kombëtare shqiptare (Ditës së Flamurit, Ditës së Mësuesit etj)  si dhe shumë shembuj të tjerë, të cilët dëshmojnë më së miri raportin e këtij pushteti ndaj shqiptarëve në Malin e Zi.
LD është qartë e përcaktuar për privatizim të drejtë, pa të cilin nuk mund të ketë shoqëri demokratike dhe përparimtare, por jo plaçkitës e kolonizues..
LD në MZ gjithsesi edhe më tej do të angazhohet për realizimin e qëllimeve të veta, të cilat shkojnë drejtë definimit final të statusit të shqiptarëve në Malin e Zi. Në këtë drejtim, prioritet i veprimtarisë sonë politike edhe më tej do të jenë:

·        Decentralizimi i pushtetit
·        Jetësimi i komunës së Tuzit me të drejta të plota dhe në kufinjt natyrorë të Malësisë
·        Përfaqësimi autentik në të gjitha organet dhe nivelet e pushtetit në MZ
·        Mbrojtja dhe avancimi i të drejtave të pakicave, duke zbatuar mekanizmat, praksën pozitive dhe standardet e njohura ndërkombëtare
·        Arsimimi në gjuhën amtare shqipe në të gjitha nivelet
·        Administrata në gjuhën shqipe, dokumentet personale publike
·        Institucionet nacionale: fakultetet, bibliotekat, institutet...
·        Anulimi i Ndërmarrjes Publike Shtetërore për Administrimin e të Mirave Detare, të cilën ne me të drejtë e quajtëm „të këqiat detare“
·        Kthimi i pronës së marrë dhe të nacionalizuar ose kompenzimi i drejtë i saj ish-pronarëve (Valdanosi, ish-Ekonomia ushtarake në Shas, në Malësi, pyjet në Plavë e Rozhajë etj.)
·        Shfrytëzimi i „Plantazheve“ me qëllim zhvillimor të territorit në të cilin ato gjenden
·        Lirimi i përmendoreve të kulturës dhe majave të maleve nga tentativat e përvetësimit nga kisha pravosllave serbe (në ishujt në liqenin e Shkodrës, heqjen e kishes së metaltë nga maja e malit Rumi, mbetjet – themelet e muranat e  Shën Mërisë – Kishës së Krajës nga shek. i 10-të etj.)
·        Ndryshimin e planit hapësinor dhe anulimi i Parkut Nacional „Prokletije“
·        Kundër korrupcionit, krimit të organizuar dhe gjendjes monopoliste në vend
·        Kundër diskriminimit

Në fund duhet shtuar se anomalia e gjithë kësaj  bëhet edhe më e madhe kur dihet  kontributi  i padiskutueshëm i shqiptarëve në rrjedhat demokratike, antiluftë e pro referendum  në këto hapësina. 

Mehmet BARDHI

Autori është bartës I LISTËS SHQIPTARE: Lidhja Demokratike në Mal të Zi – Mehmet Bardhi dhe Alternativa Shqiptare – Gjergj Camaj, në zgjedhjet parlamentarte të 29 marsit 2009 në MZ.

Ulqin 18.2.2009: LD në MZ  NË TUZ KREMTOI 1-VJETORIN E PAVARËSISË SË KOSOVËS
Në vazhdën e shënimit të datave të historisë kombëtare, si obligim të vetin programor, Lidhja Demokratike në Mal të Zi, shënoi ditëlindjen e parë të shtetit të pavarur të Kosovës. 
Në takimin e rastin, që u mbajt në lokalet e restorantit “Niagara” te ujëvarat e Lumit Cem, përpos kreut të LD-së nga të gjitha viset shqiptare në Malin e Zi dhe aktivistëve e simpatizantëve nga Dega e Malësisë, prezent ishte edhe ambasadori i Republikës së Shqipërisë z. Tonin Beci me bashkëpuntorët e vet, që e bënë edhe më madhështor këtë festim.
Me këtë rast, kryetari i LD në MZ, zoti Mehmet Bardhi, në emër të subjektit të parë politik të shqiptarëve në Mal të Zi, i ndau Fletëfalenderim Ambasadorit të SHBA-ve, për kontributin e dhënë të SHBA-ve në çlirimin dhe pavarësimin e Kosovës.
Në fletëfalënderim që e lexoi zotëri Bardhi thuhet:
- I nderuari ekselencë Ambasador Moore,
Lidhja Demokratike në Mal të Zi, partia e parë politike e shqiptarëve që janë  popull autokton në trojet e veta shekullore, sot në Malin e Zi (e formuar më 09. 09. 1990 në Tuz), me kënaqësi dhe respekt me anë të këtij fletëfalënderimi, në emër të shqiptarëve në MZ, ju falënderojmë  JU dhe përmes JUSH Shtetet e Bashkuara të Amerikës dhe udhëheqësit e saj, për të gjitha  që bënë për zhvillimet e mbara, për ndihmën,  përkrahjen  dhe angazhimet miqësore e njerëzore, diplomatike e ushtarake, shkencore-arsimore e materiale për PAVARËSINË E KOSOVËS, për realizimin e të drejtave, të shqiptarëve, për zhvillimet demokratike, për stabilitetin  e paqën e vendosur.
KOSOVA,  falë ndihmës së pakursyer e  të gjithanshme të SHBA-ve dhe Aleatëve Evropianë sot po gëzon lirinë dhe PAVARËSINË.
Faleminderit Amerikë! Me respekt. Tuz, më 17 shkurt 2009 Mehmet BARDHI, kryetar i LD në MZ dhe deputet në Kuvendin e Malit të Zi

Ulqin 17.2.2009: Mehmet Bardhi përgëzoi udhëheqësinë më të lartë të Kosovës me rastin e 1-vjetorit të Pavarësisë  

Kryetari i Lidhjes Demokratike në Mal të Zi, zotëri Mehmet Bardhi, me rastin e 1-vjetorit të shpalljes së Pavarësisë së Kosovës, u dërgoi telegram urimi udhëheqësve më të latë të Shtetit të Kosovës dhe kryetarëve të partive parlamentare: Fatmir Sejdiu, Hashim Thaçi, Jakup Krasniqi, Ramush Haradinaj, Nexhat Daci e Behxhet Pacolli, në të cilin, përveç të tjerave thuhet:
- Me rastin 17 shkurtit 2009, 1-vjetorit të shpalljes së Pavarësisë së Kosovës shtet të pavarur dhe sovran, në emër të Lidhjes Demokratike në Mal të Zi, partisë së parë politike të shqiptarëve në trojet e veta shekullore, sot në Malin e Zi, ju dërgojmë urimet tona më të ngrohta vëllazënore.
Shqiptarët nga këto treva dhe nga trevat e tjera..., në Kosovë, që në fillim, gjetën përkrahje jetëdhënëse. Atëherë kur regjimet e ish-Jugosllavive po mundoheshin të na i mbyllin të gjitha shtigjet e zhvillimit, të gjitha shtigjet e dritës, të dijes, shkollimin në gjuhën amtare shqipe, në Kosovë u shkolluan gjenerata e gjenerata dhe morëm dije në shkolla të mesme e në fakultete, ku edhe sot e kësaj dite mbet destinacioni kryesor edhe i gjeneratave të tashme. Në Kosovë morëm dijet themelore jo vetëm të mësimit të mirëfilltë, po mbi të gjitha mësimet nga atdhetaria. Me këtë rast i falënderoj të gjithë ata që na përkrahen, të gjithë ata mësues e profesorë që na dhanë mësim, që na mundësuan të shkollohemi. po edhe të tjerët, që na strehuan në shtëpitë e nxënësve dhe të studentëve. Faleminderit nga zemra. Faleminderit Kosovë!
Shpresat tona edhe më tej janë Atje. Shqiptarët në trojet e veta stërgjyshore, sot në Malin e Zi, po ballafaqohen me shumë probleme... Tash ndihma institucionale e Kosovës është më e nevojshme se kurrë. Faleminderit.
Ju njoftojmë se me rastin e 1-vjetorit të Pavarësisë së Kosovës, Lidhje Demokratike në Mal të Zi, për kontributin e dhënë në pavarësimin e Kosovës, i ndanë mirënjohje  Shteteve të Bashkuara të Amerikës, të cilën do t’ia dorëzojmë Ambasadorit të SHBA-ve në Podgoricë ekselecës së tij Roderick Moore. Edhe një herë Urime! Urime PAVARËSIA! - SHËRBIMI PËR INFORMIM

Nr.15 / 09 Tuz, më 27. 01. 2009  

1. Megjithëse zgjedhjet e shpallura nuk janë brenda mandatit (2010) as brend afatit të paralajmëruar me marrëveshjen separate POZITË – PzP (nëntor - dhjetor 2009), të arritur para aprovimit të Kushtetutës, për aprovimin e së cilës duheshin 2/3 e votave në Kuvend, Lidhja Demokratike në Mal të Zi është e gatshme dhe do të marrë pjesë në zgjedhje, për çka do të aktivizojë gjithë potencialin e saj.
2. Nisur nga interesat e përgjithshme kombëtare të shqiptarëve, që jetojnë në trojet e veta shekullore, sot në Malin e Zi, ftojmë të gjitha partitë politike shqiptare që të bisedojmë dhe mundësisht të bëjmë marrëveshje dhe të dalim në zgjedhjet e shpallura parlamentare me një listë të përbashkët, për të arritur maksimumin e mundshëm në këto rrethana shoqërore e ligjore në përfaqësimin e denjë e të plotë në Parlamentin e Malit të Zi.
3. Të formojë ekipin për bisedime në mes partive për koalicione…
4. Të formohet Shtabi Qendror Zgjedhor  dhe shtabet zgjedhore nëpër degë, dhe
5. Sa më parë, brenda javës, Kryesia e LD-së të sjellë vendimet e nevojshme në lidhje me këto aktivitete.

Ulqin 7.1.2009 KUMTESË PËR OPINION

Mehmet BARDHI, kryetar i Lidhjes Demokratike në Mal të Zi, fjala përshëndetëse në Kuvendin e 5-të të Alenancës për Ardhmërinë e Kosovës, mbajtur në Sallën e Kuqe të Pallatit të Rinisë dhe Sporteve në Prishtinë, e dielë, më  30. 11. 2008
 Të nderuar delegatë të Aleancës për Ardhmërinë e Kosovës,
I nderuar kryetar Ramush Haradinaj,
(I nderuar zotëri President  Fatmir Sejdiu, zëvendëskryeministër Ramë Manaj, i nderuar ambasador William Walker,  zotëri Stiven Shuk)
Të nderuar mysafirë, përfaqësues  diplomatë, përfaqësues të mjeteve të informimit,
Zonja dhe zotërinj, 
Në emër të Lidhjes Demokratike në Mal të Zi, të partisë së  parë politike të shqiptarëve në Malin e Zi, të formuar më 09 shtator 1990, në emër të delegacionit që është me mua, zotërinjëve: Tahir Gjonbalaj, Nikollë Camaj, Kadri Sinani dhe Miftar Balidemaj, ju falënderoj për ftesën dhe  ju përshëndes përzemërsisht, ndërsa Kuvendit i uroj punë të mbarë dhe suksese në punën e tij. 
Kosova u bë e pavarur dhe sovrane (17 shkurt 2008), por që kërkon edhe shumë angazhime, në vazhdimësi, e vigjilencë politike e diplomatike, sepse qëndrueshmëria e saj, megjithëse tashmë u pranua nga një numër i madh shtetesh (52), si tërësi, varet nga shumë faktorë, të cilët  nuk lënë vend për vetëkënaqësi. 
Shqiptarët, në trojet e veta shekullore, sot në Malin e Zi, u gëzuan pamasë dhe përshëndetën pavarësinë e Kosovës. Ne, në Kosovë, në shkollat e mesme, në fillim, e në fakultete, gjithnjë, morëm dije, që ishtë dhe është aq shumë e nevojshme, jo vetëm të shkencës së mirëfilltë, por mbi të gjitha të shkollës së atdhetarizmës. Për këtë edhe nga këtu, me plot gojën u them: FALIMINDERIT! 
Zonja dhe zotërinj, nga Kosova i kemi sytë e kthyer edhe sot, madje më shumë se dikur, sepse në kurriz të shqiptarëve po vazhdojnë të luhen lojna të rrezikshme, e kam fjalën për shqiptarët në trojet e veta shekullore, sot në Malin e Zi. Madje, si gjithherë, në këto e kësi lojnash, fatkeqësisht po marrin pjesë edhe shqiptarët, disa, madje edhe struktura politike etj., që me lojën e rrezikshme, që po bëjnë për rahatinë e tyre, të kolltuqeve, keqpërdorin pozitën dhe shpesh thirrën në Kosovën e personalitete të ndryshme të Kosovës, se e kanë përkrahjen e tyre !
E qartë është se këto janë manipulime, por që dëmtojnë, fusin huti në popull... 
Lidhja Demokratike dhe unë jemi të bindur se në AAK-në do të kenë përkrahje vetëm forcat atdhetare dhe demokratike. 
Zonja dhe zotërinj, athua nuk ka kaluar koha që për ekzistencën, jetesën e gjallërimin tonë, t’i themi dikujt “HVALA LIJEPO...” (siç u përsërit edhe para disa ditësh(!?)), madje edhe kur  na burgosin, kur na “përkëdhelin” me shkopinj, grushta dhe shqelma, sepse kërkonim të drejtat tona!? (Kur me anë të  ashtuquajturin privatizim, pa pjesëmarrjen e vendimmarrjen tonë, po na i okupojnë e kolonizojnë pasuritë tona !? etj. etj.). Jo, zonja dhe zotërinj. 
Çështja shqiptare, me Kosovën e Pavarur, po shkon përpara, por mbetet ende e pazgjidhur. Shqiptarët, në trojet e veta, sot në Malin e Zi, në Luginën e Preshevës, në Serbi, janë larg asaj që pritem e duhet të jemi. 
Megjithatë, me Shqipërinë në NATO e Kosovën e Pavarur dhe me miqtë – SHBA-të, aleatët veriatlantikë e UE-në, shpresojmë  se edhe shqiptarët në trojet e veta, sot në Malin e Zi, do të kenë ditë më të mira e perspektivë. Edhe një herë urime e suksese.

 Faleminderit.