Ulqin - Me qëllim të vendosjes së bashkëpunimit me KK "Albulena" dhe integrimit përmes sportit, në Ulqin ndodhet një grup prej rreth 20 vetësh nga Gjermania, i përbërë nga karateistë të dalluar të KK "Lotus" nga Epertsmausen - Essen nga Gjermania dhe prindërit e tyre, profesorë, etj. Në mesin e sportistëve të dalluar është edhe bashkëvendasi ynë Ismail Buriq, anëtar i Përfaqësueses së Gjermanisë në karate për seniorë, fitues i vendit të tretë në Kampionatin Botëror në Karate në vitin 2007.
Në krye të këtij grupi është Ernes - Erko Kalaç, i lindur në Mal të Zi e që tani jeton në Gjermani, ambasador i sportit i Qeverisë Gjermane pranë BE-së për integrime përmes sportit. Programi i vizitës së grupit nga Gjermania parashikon trajnimin e përbashkët ndërmjet garuesve të KK "Albulena" dhe atyre të "Lotus" dhe shoqërimin e sportistëve dhe rinisë.
Me këtë rast përfaqësuesit e "Albulena"-s dhe grupit nga Gjermania mbajtën një konferencë të përbashkët për media për të bërë të njohur fillimin e këtij bashkëpunimi ndërmjet "Albulena"-s dhe KK "Lotus", si dhe për të bërë të njohura rezultatet e arritura nga garuesit e KK "Albulena", përfaqësues të Malit të Zi, në Kampionatin Ballkanik në Gju Gjicu të mbajtur para disa ditësh në Novi Sad.
Ambasadori i sportit Ernes Kalaç, ka realizuar me sukses një program volunterizmi me karakter sportiv në BE.
Ai tregoi se ky program ka dhënë fryte në BE dhe se synimi i tij është që diçka të tillë ta realizojë edhe në Mal të Zi.
"Dëshiroj që volunterizmi të jetë i pranishëm në Mal të Zi sepse pa volunterizëm nuk ka asgjë", tha ai.
Menaxheri i KK "Albulena", Rifat Stankoviq, duke folur për Kampionatin Ballkanik në Gju Gjicu, theksoi se është krenar për rezultatet e arritura nga garuesit e KK "Albulena".
"Garuesit e klubit tonë kanë dëshmuar se janë më të mirët dhe ne jemi krenarë që një punë e mirë vlerësohet me medalje në Kampionatin Ballkanik", tha ai.
Trajneri i KK "Albulena", Agron Ujkashi, vlerësoi rëndësinë e trajnimit të përbashkët duke thënë se ai mundëson shkëmbimin e përvojave dhe që fëmijët të shoqërohen.
Në konferencën për shtyp, medias iu drejtua edhe Nikolla Prodanoviq, garues i KK "Albulena", fitues i medaljes së artë në Kampionatin Ballkanik në Gju Gjicu, kurse në të merrnin pjesë edhe drejtues dhe garues të tjerë të KK "Albulena" dhe Ismail Buriq.
KK "Albulena" është e ftuar të marrë pjesë në Turneun "Nikolas Cup", i cili do të mbahet më 13 dhjetor të këtij viti në Gjermani e që do të jetë vizitë kthyese.